Mat 27 | GAM | STEP | Kam tago au djika, opa gale awi una kerman ne, Juda una kerman kambono ge kandja beglo, Jisas to gopon we dji.

Matthew 27

Jisas ipo Pailat awi

(Mak 15.1 ne, Luk 23.1-2 ne, Jon 18.28-32)

1 Kam tago au djika, opa gale awi una kerman ne, Juda una kerman kambono ge kandja beglo, Jisas to gopon we dji. 2 Dje Jisas kaye to ipo gapman iwa kerman Pailat moi al pi.

Judas goi

(Aposel 1.18-19)

3 Jisas to gopon we dji mal ge Judas kane nomane ake toi. Toika, opa gale awi una kerman ne, Juda una kerman ku silpa 3-pela ten (30) asa awi mal ge, Judas ku ge ipo yem woro awo une kambono moi al embe dji, 4 Jisas ke ta nayei ba, na dje ipo ye aglene al pakna worill ye une to goye ge, na ke yell we dji. Djika kambono embe dji, no kogene ta man, ni nenem kogen we dji. 5 Djimaka Judas ku ge i lotu numb kerman gull pai al pup to pakna woro kere, po ka to golo pai.

6 Opa gale awi una kerman kambono po ku yei ge amblo i embe dji, ku yero ge meyam bai ku yero. Lotu numb kerman opa i pakna worbon kune nayenda we dji. 7 Kambono kandja dje i taimane woro embe dji, una galla beke yenj makimbne yero ge, nono ku ge ipo top to imbonka, dumo ellke una ta wo goi dal, makimb ge al ipo gull tambon we dji. 8 Kambono kandja embe dje pille po top to imaka, una kane makimb ge kandjiye dalo embe dji, makimb ge meyam makimb yero we dji. Kandjiye yei ge ye pa pi, ipon yero. 9 Kambono po embe yemaka, asa propet Jeremaia pepa bolo pagi ge megiye toi. Une embe dji, iwa ge ku boya mal pille, Israel una ku silpa 3-pela ten (30) yero mal boya we dji. 10 God Iwa Kerman kandja dji mal na pille yell. Ga ku ge ipo galla bekinj una makimbne top to i we dji.

Pailat embe dji, Jisas, ni Juda una Kingne kaima moren mo? dji

(Mak 15.2-5 ne, Luk 23.3-5 ne, Jon 18.33-38)

11 Jisas agle moika Gapman iwa kerman Pailat kot pille embe dji, Juda una mor ge ni kingne moren mo? dji. Jisas ge wale, nenem djinden we dji. 12 Opa gale awi una kerman ne, Juda una kerman kambono ge Jisas moi al kandja kayekaye dje be be woro moi ba, Jisas kandja dje yem woro nawi. 13 Pailat embe dji, kambono kandja merkeke dje ni boll worinj ge ni napren mo? dji. 14 Djika Jisas kandja ta dje yem nawori, Pailat kane aya dje gok dji.

Pailat, Jisas nil to golme! dji

(Mak 15.6-15 ne, Luk 23.13-25 ne, Jon 18.39—19.16)

15 Juda una ege kerman pasopa we dji ge yei. Ege yei kune ge una djimaka Rom iwa kerman kaye pai una taimane dje i orko woro woro yei. 16 Kune ge iwa ke ta kaye pai, yene kandjiye ge Barabas we dji. 17 Pailat embe dje kani, opa gale awi una Jisas dje i na moll al woj ge, Jisas kiyam to, na to goyo dje pille iwinj dje kani. Embe kanika una kerman wo makai to molmaka Pailat embe dji, na una ne dje orko worno? Na Barabas dje orko worno mo? Mo, na Jisas God dje wori woi Krais we dji iwa ge, dje orko worno ne? dji.

19 Dje une kot pille pa moika, yene game kandja sigiye dje woro embe dji, imina pika na ou pa, oukumb ta kanill. Iwa ge wo moika, na nomana to pille urup dje pro. Iwa ge ale ta nayei iwa, ni ye ke ye naumben! we dji.

20 Ba opa gale awi una kerman ne, Juda una kerman kambono kandja elnge ye djimaka una merke moi ge, iwa Barabas dje i orko worben; Jisas to gopen we dji. 21 Pailat kandja asa dji mal alla are kandja dje embe dji, soka mormell ge na ne mal ta dje orko worno? Una merke moi ge Barabas dje orko worben we dji. 22 Pailat embe dji, Jisas God dje wori woi iwa Krais we dji ge, na namba mal yeno ne? dji. Una porapora embe dji, iko pera al ge nil to gole! dji. 23 Pailat embe dji, une ke namba mal yei pille ye to gopon we djinj ne? dji. Une kandja embe dji ba, una kandja napi, yau kerman to embe dji, iko pera al ge nil to gole! dji.

24 Djimaka Pailat kani una kandja napi; kunda kakne paika, une nu kolo i, una nalene al, yene agle was ye woro embe dji, iwa goya ge, na une boll ale ta napanda. Une golo dji dal, ye yenekne kogone, na kogena ta man we dji. 25 Djika una porapora embe dji, iwa ge golo dji dal, nonekene boll ke pandaka, no wombane boll ke para aike panda we dji. 26 Una kandja dji mal pille, Pailat iwa Barabas dje orko wori woika, Pailat ami una dje awika, kambono Jisas ka prangill toi. To kermaka, Pailat ami una djika kambono Jisas iko pera al to gopon dje er pi.

Ami una Jisas to bakalo awi

(Mak 15.16-20 ne, Jon 19.2-3)

27 Pailat amiye una ge wo Jisas i gapman numbiye al pi. Ami una porapora wo makai to molmaka Jisas pakna moi. 28 Moika ami una Jisas koniye kunomiye gulo iworo, kon bage momo ta iwo woro awi. 29 Ami kabono, king kon pula kakinj mal ka kagle boll iwo kakuba ye Jisas ngambale al pagi. Kapill ta iwo Jisas agle woto woro, ga kakene gopiye boglo Jisas bakalo awo embe dji, Wopakeiwo! Juda una kingne iwa kerman wonden we dji. 30 Dje molo kungo to, ga kapill i Jisas awi ge i yem woro yene ngambale al toi. 31 Embe ye bakalo awo kere, kon bage awi ge i yem woro, yene koniye kunomiye alla woro, iko pera al nil to gopon dje i er pi.

Jisas iko pera al nil toi

(Mak 15.21-32 ne, Luk 23.26-43 ne, Jon 19.17-27)

32 Ipo kani dumo Sairini iwa Saimon we dji ta moi. Ami una djimaka, Jisas iko pera kake ipi ge Saimon po i kaki. 33 Dumo ta kandjiye Golgota we dji yei al ge pi. Dumo Golgota we dji ge me embe mal pai, una ngambalne yembe dumo we dji. 34 Dumo Golgota womaka una wo kisai dongall i nu wain al pakna woro, Jisas nonda dje awi ba, Jisas kembis ta no pille, alla man dje, nanoi. 35 Ami una Jisas iko pera al nil to pagi paika, Jisas koniye kunomiye gulo i kas mal embe toi. 36 To kermaka ami una ami dje molo, Jisas goya dje pille kane moi. 37 Jisas kot yei mal, una mon bolo i une ngambale al iko pera plato pagle embe dji, iwa moro ge Jisas. Une Juda una Kingne moro we dji. 38 Ke yepill una soka tomaka papill; ta i agle woto iko pera al nil to pagle, ta i agle darto nil to paglmaka, Jisas pakna pai. 39 Jisas iko al nil to wori paika, una kond wo pi ge kane bakalo awo, burkome ye awo embe dji, 40 na lotu numb kerman to sellko woro, ege sokara wor pundaka alla takno we djin iwa moren ge, nenem amblo pille dje imben, ni God wariye kaima mon dal, iko pera al kere er kal we! dji. 41 Una yei mal embe ge opa gale awi una kerman ne, Juda una kerman ne, God loye dje awi una kambono ge para wo Jisas bakalo awo yenekne kandja dje embe dji, 42 asa Jisas una amblo pille dje awi ba, ipon yene amblo pille djinda ge, kune nayendo. Une Israel una kingne kaima moi dal, iko pera al kere er kal wondaka, nono kaima pillgi djimbon. 43 Jisas yene nomane i God awo, nanam God wariye moro we dji mal ge, God Jisas wopake kani dal, une Jisas amblo pille dje aunda we dji. 44 Una dji mal embe ke yepill iwa soka iko pera al nil to wori papill ge, Jisas bakalo aupill.

Jisas goi

(Mak 15.33-41 ne, Luk 23.44-49 ne, Jon 19.28-30)

45 Aupillka 12 oklok yeika, dumo porapora emill ye pa pika taman pika alla poi dji. 46 Djika ^{▼▼Jisas yau toi ge 3 oklok yei}, Jisas yau kerman to embe dji, Eli Eli lema sabaktani we dji. Kandja me ge embe mal paro, God! Ni na Godna moren ge! Ni na namba yei pille kerden ne? dji. 47 Embe djika una kane moi ge embe dji, Jisas yau tondo ge Elaija pille yau tondo we dji. 48 Djimaka iwa ta muk dje po bogandara mal embe i bulo al woro, nu wain to balo, i pla Jisas nonda dje pille awi. 49 Ba una moi ge embe dji, ni kere! Nono kane mopon, Elaija wo une amblo pille dje i kal worda mo man ne? dji. 50 Djimaka Jisas yau kerman to nomane kere goi.

51 Goika lotu numb kerman numogto allap kolo pagi ge, pakna weye kaima ball dje er kal wo soka yei. Imem kerman woika, makimb al ku kerman moi ge billa dje soka soka yeika, 52 una gull to mogi al ge, alla au dje kiwa yeika, pillgi dji una asa goi ge alla kere agle er wo gun pi. 53 Jisas are agle er wo gun pika, ga kambono ge Jerusalem po molmaka, una merke kani. 54 Imem kerman woika, wal porapora yei mal ge, ami iwa kerman ne, ami kiwa moi una Jisas iko pera al kantau moi kambono kane kand kerman golo embe dji, ipon iwa goro ge God wariye kaima moro we dji.

55 Ana merke ellke molo kane moi. Jisas distrik Galili kere er woi ge, ana ge une boll aike wo, pak to awo embe ye moi. 56 Ana ta moi ge dumo Makdala ana Maria. Ta Jems ne, age Josep boll mane Maria. Ta iwa Sebedi wariye soka mopill ge mane gama moi.

Jisas ipo ku mur al gull toi

(Mak 15.42-47 ne, Luk 23.50-55 ne, Jon 19.38-42)

57 Emill kindja djika, iwa ta dumo Arimatea ku kane noi iwa Josep we dji ge woi. Une Jisas kogoye una ta moi. 58 Une po Pailat moi al embe dji, Jisas goro ge na ipo gull tano we dji. Pailat, kune we dji. Une kandja sigiye dje woro embe dji, Jisas goro ge ye i iwa wondo ge aume! dji. 59 Asa Josep yene goya kune ge une pille djika, una po ku kerman ta yei al asamoll wallke tudo pakna pi. Une po allap wopake ta yei ge, iwo Jisas gakle al were pagle, ku kerman tudo yei al ipo, ku kerman taban ta yei ge une pera woro ipo to bi dje pagi. Une embe ye kere er pi. 61 Pika dumo Makdala ana Maria ne, Maria ta yeika, Jisas gull to pagi al soka ami dje molo kane koi woro mopill.

Jisas gull toi al ami una kantau moi

62 Kam kumaike kana pika, ege Sabat yei kune ge, opa gale awi una kerman ne, Parisi una kambono ge Pailat moi al po embe dji, 63 iwa kerman, iwa goi ge kende dje wani una moi. Une gun moi kune ge, une kandja ta dji pupin ge embe dji, na golo ege sokara wor pundaka na alla agle er wo gun puno we dji. 64 Une kandja embe dji pille ni kandja dje ami una aumbenka, kambono po gull to pagi al kantau moyeke, ege sokara wor punda. Man pandaka, une kogoye una wo iwa golo pai ge wo kunumb i pagle, kandja kende dje embe djine, Jisas agle er wo gun pundo we djine. Alla Jisas yene agle wo gun puno we dji mal ge kune nayei. Ba alla une kogoye una wo Jisas agle er wo gun pundo we dji dal, ge kune kaima nayenda we dji. 65 Djimaka Pailat pille embe dji, kune. Gull to wori paro al ge, ye ami una dje ipo ye nomane paro mal pille, amblo pell dje wopake ye molme! dji. 66 Djika ga po gull to pagi al amblo dongall ye, gapman mon bolo ku al pagi pai. Paglmaka una wo ku i woro djine dje pille ami una kantau moi.